O GI-Esculca da Universidade de Santiago de Compostela continúa reforzando o seu compromiso coa investigación aplicada e coa transferencia de coñecemento á sociedade. Grazas ao convenio de colaboración co Concello de Xinzo de Limia, desenvolverá entre o 17 de setembro e o 10 de outubro de 2026 o curso “Participación, educación e inclusión na sociedade de acollida”, unha acción formativa de 90 horas dirixida a persoas migrantes e culturalmente diversas do municipio.
Ao longo de catro módulos abordarase o papel da escola, da administración local, das entidades sociais e da comunidade como espazos clave para construír sociedades máis inclusivas, promovendo a participación cidadá, a convivencia intercultural e o exercicio efectivo dos dereitos. O programa complementarase cun proceso de asesoramento, acompañamento e avaliación dos resultados acadados.
Nesta iniciativa implicaranse numerosas investigadoras e investigadores do GI-Esculca, xunto con profesionais de administracións públicas e entidades sociais especializadas, conformando un equipo multidisciplinar que achegará coñecemento científico e experiencia práctica ao servizo da inclusión social.
Un proxecto que exemplifica a importancia da colaboración entre universidade, administración local e tecido social para construír comunidades máis cohesionadas, participativas e abertas á diversidade.