Arredor do rural

Obxectivo global do proxecto

A Comunidade de Accións e Saberes Arredor do Rural (www.arredordorural.org) é unha iniciativa que pon en relación profesorado e colectivos sociais que traballan pola sustentabilidade no medio rural, ca fin de promover experiencias de aprendizaxe-servizo.

Pártese de dúas necesidades recoñecidas en común entre diversos colectivos ecoloxistas e ruralistas: a construción de prácticas sustentables dende proxectos de base coñecemento e acción colectiva, así como a loita contra o despoboamento a través da fixación de poboación xove. Estas, dan sentido a dous obxectivos principais:

1. 1. Recoller e dignificar os saberes locais-populares para articulalos conxuntamente co saber científico para argallar formas de construción da sustentabilidade.
   2. Visibilizar e dignificar o medio rural entre o estudantado para fomentar proxectos de futuro nel, para fomentar a fixación de poboación e reducir problemas relacionados co despoboamento.

As formas de materializarse estes obxectivos varían respondendo ás diferentes entidades participantes e disciplinas implicadas, das cales as seguintes poden servir de exemplo:

• • Análise de actitudes e crenzas sobre o medio rural comparada en poboación rural e urbana para optimizar as accións de sensibilización (psicoloxía).
  • Deseño dun plan de financiamento para entidades de economía social do medio rural (finanzas).
  • Participación nunha campaña de sensibilización sobre o cambio climático a través da realización de pezas audiovisuais (socioloxía).
  • Colaboración con colectivos de agroecoloxía e de patrimonio para mellorar a súa interacción cos centros escolares (maxisterio).

Fases

No marco do proxecto xeral a participación do alumnado foméntase en dúas fases:

• • A fase de execución dos proxectos, que se desenvolve de maneira paralela en cada un deles (acadan unha grande diversidade debido a que non estamos a falar dun único proxecto en si, se non do marco para moitos proxectos, que poden ser consultados en https://www.arredordorural.org/accions.).
  • A fase de revisión das experiencias e de ideación de outras novas. Esta lévase a cabo de maneira bianual e convídase ao estudantado a participar nun encontro xunto con persoas dos colectivos e profesorado universitario, que ten carácter divulgativo e formativo e no que se recollen propostas de mellora das diferentes experiencias.

Responsabilidades do alumnado

Estas varían tamén segundo os diferentes proxectos, mais búscase que entre elas estea:

• • Manter o contacto activo ca comunidade coa que colaboran.
  • Difusión das súas accións no marco da universidade a través de diferentes medios.
  • Deseño das accións finais que van desenvolver ou que propoñen a outro estudantado.

A reflexión, en todo caso, se realiza tanto coas persoas do colectivos co que se colabora, de forma paralela ó traballo directo, como tamén no marco das aulas que se integran no proxecto.

A nivel temporal, lévase a cabo de maneira parella ás interaccións cos colectivos, así como unha breve valoración final. Con respecto á reflexión na aula, dáse en alo menos dous momentos: un momento intermedio no que se iniciou xa o proxecto e un momento final de peche. Xuntamente, o alumnado é convidado en todo caso ós encontros da Comunidade de Accións e Saberes Arredor do Rural que supoñen tamén un foro reflexivo do conxunto dos proxectos.

A orientación das sesións de reflexión inclúen sempre:

• • A dimensión persoal, de crecemento actitudinal.
  • A dimensión profesional e académica, relacionando o feito coa disciplina e a súa proxección
  • A dimensión do papel do medio rural no sistema, falando das relacións urbano-rural, a representatividade nos medios de comunicación e ensino e relevancia na sustentabilidade.