Proxecto Hermés

O servizo prestado á comunidade parte da necesidade informada pola institución (CEE Manuel López Navalón) de establecer pontes de conexión entre os axentes que teñen un papel clave no avance e mellora do proceso de inserción socio-laboral das persoas con discapacidade (concretamente, do alumnado matriculado nos programas formativos de FP).

Deste xeito, un dos obxectivos do ApS era o establecemento de vías de intercambio de coñecemento e a xeración de espazos de interacción entre Universidade-Administración-Sociedade. Así, no proceso de recollida de datos para a elaboración dos traballos do alumnado e de transferencia dos informes derivados, xa se deu cumprimento parcial a esa meta (universidade-CEE). Asemade, de forma complementaria, o 28 de abril de 2023 celebrouse no Pazo de Fonseca (USC) a “XORNADA de EDUCACIÓN, ARTESANÍA E INCLUSIÓN: NOVOS DESAFÍOS PARA VELLAS DEMANDAS”, onde se xeraron actividades formativas (o alumando universitario presentou os resultados do seu traballo de investigación), divulgativas (asistiron representantes da administración, profesionais e expertos relatores na temática e dúas asociacións -Artefíos e Artesanía de Galicia- que traballan nesta senda) e lúdicas (o alumnado do CEE presentou os produtos que elaboran xunto co seu profesorado nos módulos formativos); de transferencia (asistiron á xornada profesionais da USC -SEPIU- e cargos de xestión da institución, as familias do alumnado do CEE e mestres/as en exercicio). Esta xornada deu resposta a outro dos obxectivos claves do ApS: a posta en valor das organizacións que traballan en prol da inserción sociolaboral de persoas con discapacidade.

Un dos elementos clave da práctica educativa desenvolta no marco de Proxecto ApS Hermés é a reflexión dos axentes involucrados a partir da práctica. Alén desta idea, deséñanse espazos e escenarios que promovan a xeracións de prácticas reflexivas de carácter grupal e individual:
Sesións grupais macro. Durante o desenvolvemento do proxecto convócanse dúas xuntanzas cos/as participantes, onde se xera un intercambio de información sobre os obxectivos alcanzados, as problemáticas xurdidas e o avance da iniciativa.  
Sesións grupais micro. Cada semana as cinco equipas de traballo que configuran o alumnado da materia reúnese co profesorado para informar dos avances do informe que están a realizar sobre as temáticas de cada traballo, asociadas a cada un dos módulos formativos do centro escolar. Nestas titorías resólvense dúbidas, faise unha posta en común da calidade da interacción intragrupo e  faise un seguimento polo miúdo dos progresos nos produtos xerados.
Sesión de presentación de resultados. Ao final de semestre o alumnado participante presenta os resultados do seu traballo e da experiencia de participación no proxecto Hermés na última sesión de aulas; facendo unha presentación oral diante de todos/as os seus compañeiras/os e do profesorado da materia.
Celebración da XORNADA EDUCACIÓN , ARTESANÍA E INCLUSIÓN: NOVOS DESAFÍOS PARA VELLAS DEMANDAS, coa finalidade de creación de pontes de conexión entre Universidade-Administración-Sociedade. Cóntase coa participación de moitos dos colectivos involucrados  na transformación socioeducativa cara a un modelo inclusivo. Este evento está baseado no intercambio de coñecemento, de pareceres, e de información. Consecuentemente, realízase retrato holístico da situación grazas á participación dos seguintes colectivos: Universidade (alumnado, profesorado, SEPIU, cargos de xestión institucional), CEE Manuel López Navalón (profesorado, alumnado e familias), representantes da administración autonómica (Xunta de Galicia), e organizacións do tecido asociativo (Artesanía de Galicia, Artefíos). A idea clave e que emerxan propostas dende cada unha das perspectivas e se materialicen sinérxicamente en propostas e vías de mellora dende un fundamento científico, experiencial, académico, institucional, profesional e persoal, sobre a construción dun modelo de atención á diversidade funcional baseado na equidade, na normalización das diferencias, nas potencialidades das persoas e  na xustiza social.