Proxecto PEINAS

1. Inserción sociolaboral de colectivos culturalmente diversos. O alumnado estuda os perfís profesionais dos/as usuarios/as das diferentes entidades e posteriormente desenvolve unha intervención adaptada. En ocasións, as/os propios participantes impartiron diferentes cursos formativos referidos a habilidades sociorelacionais, elaboración de currículos, técnicas de procura de emprego, manexo de plataformas en liña…
2. Optimización e mellora dos procesos de ensino-aprendizaxe. As alumnas e alumnos preparan diferentes sesións de técnicas de estudo cos/as usuarios/as para axudarlles a optimizar o seu proceso de aprendizaxe. De maneira eventual, tamén participaron en programas de alfabetización acompañando e apoiando ao persoal encargado deste tipo de iniciativas.
3. Lecer e tempo libre. Nalgunha das edicións e en entidades concretas, téñense posto en marcha diferentes iniciativas vinculadas á pedagoxía do lecer. É así que o alumnado programaba múltiples actividades para as/os nenos/as durante a duración do proxecto, axudando na organización de actividades relevantes e senlleiras para o colectivo (Día nacional do Senegal, Día do pobo Xitano, Día da non discriminación por motivos raciais…).
4. Difusión e sensibilización. Por último, deseñáronse diferentes campañas de sensibilización, procurando empoderar aos receptores das diferentes iniciativas en habilidades relacionais e interculturais. Así, leváronse a cabo xogos de rol, dinámicas participativas e campañas, na universidade e en institutos de Secundaria de zonas próximas á capital de Galicia. Todos eles deseñados, programados e implementados polo alumnado participante.
Cabe salientar, que por mor da COVID, no ano 2020 suspendeuse o proxecto cando xa estaba iniciado. Nos anos 2021 e 2022 tense adaptado ás novas circunstancias incorporando unha ferramenta virtual como é a Revista “Olladas” na cal se difunden contidos vinculados á xestión educativa da diversidade cultural e a prevención da discriminación. Así, ademais de elaborar contidos específicos, téñense realizado entrevistas, reportaxes e outro tipo soportes audiovisuais que se difunden a través das diferentes Redes Sociais habilitadas.

Durante o desenvolvemento do PEINAS, o profesorado dálle moita importancia á creación de momentos onde se incentive a reflexión a partir da práctica. Deste xeito, habilítanse os seguintes foros que conectan currículum con servizo:

• Sesións grupais de seguimento. Unha vez ao mes todas/os os/as participantes do proxecto reúnense nunha sesión onde se expón en gran grupo os avances, problemáticas, desafíos ou trabas que están tendo no desenvolvemento particular das iniciativas. Despois, entre todas e todos establécese un debate no cal se buscan sinerxias e onde xurden posibles solucións que permiten continuar nas diferentes realidades. Nestas sesións o profesorado aproveita para evidenciar os contidos curriculares e a súa concreción na práctica.
• Sesións individuais de seguimento. Alomenos en dúas ocasións durante o cuadrimestre cada equipo de traballo debe reunirse co profesorado para analizar as particularidades de cada entidade e dos plans elaborados.
• Sesión de presentación de resultados. Ao final de cuadrimestre o alumnado deberá presentar en aula o proxecto elaborado facendo partícipe as súas compañeiras e compañeiros de todo o proceso e da xustificación técnica das decisións tomadas.
• Redes sociais e blog do proxecto. O PEINAS ten habilitado un blog e diferentes perfís nas redes sociais onde o alumnado vai mostrando de maneira pública os seus quefaceres no marco das entidades. Deste xeito, ademais da evidente difusión de resultados, preténdese que centren a comunicación que queren facer chegar as destinatarias desa información.